KIEV, 7 Jolay (Xinhua) -- Tonga tao Kiev ny alatsinainy ny lamasinina fitaterana entana mivantana voalohany, izay niala tao afovoan-tanànan'i Wuhan any Shina tamin'ny 16 Jona, ka nanokatra fahafahana vaovao ho an'ny fiaraha-miasan'i Shina sy Okraina, hoy ny manampahefana Okrainiana.
"Manana dikany ara-panoharana manan-danja ho an'ny fifandraisan'i Shina sy Okraina ny hetsika androany. Midika izany fa hihamafy kokoa ny fiaraha-miasa eo amin'i Shina sy Okraina ao anatin'ny rafitry ny Belt and Road Initiative," hoy ny masoivohon'i Shina any Okraina, Fan Xianrong, nandritra ny lanonana nanamarika ny fahatongavan'ny lamasinina teto.
"Hampiseho ny tombony azony amin'ny maha-foibe ara-pitaovana mampifandray an'i Eoropa sy Azia azy i Okraina, ary ho haingana kokoa sy ho mora kokoa ny fiaraha-miasa ara-toekarena sy ara-barotra eo amin'i Shina sy Okraina. Hitondra tombontsoa bebe kokoa ho an'ny vahoakan'ny firenena roa tonta izany rehetra izany," hoy izy.
Nilaza i Vladyslav Kryklii, Minisitry ny Fotodrafitrasa ao Okraina, izay nanatrika ny lanonana ihany koa, fa ity no dingana voalohany amin'ny fitaterana kaontenera tsy tapaka avy any Shina mankany Okraina.
"Ity no voalohany tsy hoe nampiasaina ho sehatra fitaterana entana avy any Shina mankany Eoropa fotsiny i Okraina, fa ho toerana farany haleha ihany koa", hoy i Kryklii.
Nilaza tamin'ny Xinhua i Ivan Yuryk, lehiben'ny lalamby Okrainiana vonjimaika, fa mikasa ny hanitatra ny lalan'ny fiarandalamby fitaterana entana ny fireneny.
"Manana fanantenana lehibe izahay momba ity lalan'ny kaontenera ity. Afaka mahazo (fiaran-dalamby) tsy any Kiev ihany izahay fa any Kharkiv, Odessa ary tanàna hafa koa," hoy i Yuryk.
"Amin'izao fotoana izao, efa nanao drafitra niaraka tamin'ireo mpiara-miombon'antoka aminay izahay momba ny lamasinina iray isan-kerinandro. Habetsahana antonony izany ho fanombohana," hoy i Oleksandr Polishchuk, lefitra voalohan'ny lehiben'ny Liski, sampan'ny orinasa lalamby Okrainiana izay manampahaizana manokana amin'ny fitaterana intermodal.
"Indray mandeha isan-kerinandro dia ahafahanay manatsara ny teknolojia, mandamina ny fomba fiasa ilaina miaraka amin'ny fadin-tseranana sy ny manampahefana mpanara-maso, ary koa amin'ny mpanjifanay," hoy i Polishchuk.
Nanampy ilay manampahefana fa ny lamasinina iray dia afaka mitondra kaontenera hatramin'ny 40-45, izay mitentina kaontenera 160 isam-bolana. Noho izany dia hahazo kaontenera hatramin'ny 1.000 i Okraina hatramin'ny faran'ity taona ity.
"Tamin'ny taona 2019, i Shina no mpiara-miombon'antoka ara-barotra manan-danja indrindra amin'i Okraina," hoy i Olga Drobotyuk, mpahay toekarena Okrainiana, tao anaty tafatafa nifanaovana tamin'ny Xinhua vao haingana. "Ny fandefasana lamasinina toy izany dia afaka manampy amin'ny fanitarana sy fanamafisana bebe kokoa ny fiaraha-miasa ara-barotra, ara-toekarena, ara-politika ary ara-kolontsaina eo amin'ny firenena roa tonta."
Fotoana fandefasana: 07 Jolay 2020